ပုဂံရှေးဟောင်း သုတေသနပြတိုက်ထဲမှာ ဘာတွေရှိသလဲ

Credit to Popular Journal –

ယခုဘဏ္ဍာနှစ် ပထမ လေးလတာကာလတွင် ပုဂံရှေးဟောင်း သုတေသနပြတိုက်သို့ ပြည်တွင်းပြည်ပ ခရီးသွားဧည့်သည် (၁၆,၀၀၀) ကျော်ဝင်ရောက်ခဲ့ပြီး ယင်းမှ ငွေကျပ်သိန်း (၁၇၀) ကျော် ရရှိခဲ့ကြောင်း ပုဂံရှေးဟောင်း သုတေသနပြ တိုက်ထံမှ သိရသည်။

“ပြည်ပဝင်ရောက်မှုကတော့ နည်းပါသေးတယ်။ ပြည်ပထက် ပြည်တွင်းခရီးသွားတွေ ပိုများတယ်” ဟု ပုဂံရှေးဟောင်း သုတေသနပြတိုက်မှ တာဝန်ရှိသူတစ်ဦးက ပြောသည်။

ပြတိုက်ကြီးတွင်ပြခန်း (၁၀)ခန်းပါဝင်ပြီးတန်ဖိုးကြီးရှားပါးပစ္စည်းများအနေဖြင့် ပုဂံခေတ် ၁၁ ရာစုလက်ရာ ကြေးကြာဖူးနှင့် (၅၅၀) ဇာတ်တော်မှ ဇာတ်နိပါတ် (၉၆) တေလပတ္တဇာတ်တော်အကြောင်းရေးဆွဲထားသော ပုဂံခေတ်မူရင်း အဝတ်ပန်းချီလည်းရှိသည်။

ပုဂံခေတ်စာပေပြန်ခန်းရှိ မြစေတီ ကျောက်စာကို ပျူ၊ မွန်၊ မြန်မာ၊ ပါဠိစသည့်ဘာသာလေးမျိုးဖြင့် ရေးထိုးထားသည့်ကျောက်စာ၊ တမီးလ်၊ ယိုးဒယား၊ ပျူနှင့် တရုတ်ကျောက် စာများ၊ ခဲပြားစာ၊စဉ့်ကွင်းစာ၊အုတ်ခဲစာ၊ ပေစာ၊ ပုရပိုဒ်စာ၊ အုတ်ခွက်စာနှင့် မင်စာများလည်းပြထားသည်။

ဘုရား (၄၁၆)ဆူအနက်မှ ကူးယူထားသည့် ပုဂံခေတ်မှ ညောင်ရမ်းခေတ်အထိ နံရံ ဆေးရေးပန်းချီလက်ရာများနှင့် အဝတ်ပန်းချီ(ကျိုက်တငိုလ်)ကိုလည်း တွေ့ရမည်ဖြစ်သည်။ထို့ကြောင့် အတွေးအခေါ်တို့ပြောင်းလဲလာသည့် ဖြစ်စဥ်တို့ကိုလေ့လာရင်းယဥ်ကျေးမှုဓလေ့၏တန်ဖိုးတို့ကို အံ့သြလေးစားစေသည့်ပြတိုက်သို့ လာရောက်ကြည့်ရှု့သင့်လှသည်။

ပုဂံရှေးဟောင်း သုတေသနပြတိုက်သည် တနင်္လာနေ့နှင့် အများပြည်သူ ရုံးပိတ်ရက်များမှအပ နေ့စဉ် နံနက် (၉) နာရီခွဲမှ ညနေ (၄) နာရီခွဲအထိ ဖွင့်လှစ်ထားပြီး ပြတိုက်ဝင်ကြေးအနေဖြင့် ပြည်တွင်း ခရီးသွားတစ်ဦးလျှင် (၁၀၀၀) ကျပ်နှု န်း သတ်မှတ်ထားကာ (၁၂) နှစ်အောက် ကလေးငယ်များနှင့် ကျောင်းထောက်ခံစာ ပါရှိပြီးလာရောက်လေ့လာသူ ကျောင်းသား/သူများနှင့် ရဟန်း၊ သံဃာများကို ဝင်ကြေး ကင်းလွတ်ခွင့်ပြုထားပြီး နိုင်ငံခြားသားတစ်ဦးလျှင် ဝင်ကြေး (၁၀၀၀၀)ကျပ် သတ်မှတ်ထားသည်။

ပုဂံရှေးဟောင်းသုတေသနပြတိုက်သို့ ၂၀၂၂-၂၀၂၃ ဘဏ္ဍာနှစ်အတွင်း ခရီးသွားဝင်ရောက်မှု (၈၃ဝဝဝ)ကျော်ဝင်‌ရောက် ခဲ့သည့်အနက် နိုင်ငံခြားသား(၃၂၈)ဦးသာ ရှိခဲ့ပြီး ၂၀၂၃ – ၂၀၂၄ ဘဏ္ဍာနှစ်အတွင်း ခရီးသွားဝင်ရောက်မှု (၉၄၀၀၀) ကျော်ဝင်ရောက်ခဲ့ရာတွင် နိုင်ငံခြားသား ခရီးသွားဝင်ရောက်မှု(၆၅၆)ဦး ရှိခဲ့ကြောင်း သိရသည်။